(Guangzhou)今日行程：
廣州酒家、郵政博覽館、白天鵝賓館、廣州動物園、麥當奴
尋晚訓得唔多好，都唔知係冷氣唔夠還是被舖太厚，訓到成身汗，搞到醒下訓下。
執好晒野，就落酒店lobby寄存行李同check-out，仲有兌人民幣(唔夠錢用了)。之後又搭地鐵去長壽路站一帶的第十甫路同上下九步行街揾野食；
結果因為落雨，衝左入去「廣州酒家」，但呢間酒家好奇怪，入到去坐低先知地下個層竟然係有西餐同小菜食，樓上先有點心；酒家中間仲有一個錦鯉湖同老樹。結果叫左香茅乳鴿、沙灣魚頭煲、干炒牛河同炸香蕉。
之後行去黃沙站搭巴士去廣州動物園，途中經過郵政博覽館同白天鵝賓館。
第一次搭廣州的巴士，搭左廣州一汽的6號線，有報站的廣播，d避震好浮，搭左成個鐘先去到廣州動物園，但分站唔多。
去到廣州動物園，尚餘一小時就關門，但我地都只係得一小時的時間行，所以決定俾每人￥20入去，仲花左半個鐘用每人￥10去坐導覽車遊動物園一個圈，但走馬看花，好多動物都睇唔到睇唔清楚，好似大象呀羚羊呀鹿呀等都係離遠挑，甚麼河馬同犀牛同熊貓就影都無。之後落車行番去睇左d天鵝同老虎。其實好想仔細參觀呢個動物園，只可惜唔夠時間同精力，同埋落緊毛毛雨。
但睇完動物園，我地已經山窮水盡，身上得番￥16，搭番巴士同地鐵返酒店就得番￥8，連dinner都無錢食，惟有去左附近的麥當奴，用埋淨低的￥8買左兩件香港無的奶黃批，入面竟然有乾提子，好怪唔多好食。
身無分文的入番去hotel拎行李，就上巴士起程返香港，有點唔捨得同留戀廣州，廣州有d野仲好過香港，無想像中咁差，只少物價低。
坐住架VOLVO B7R返香港，個司機係廣深等高速公路踩到超過120公里，第一次坐住部巴士係公路飛得咁快，都好驚好恐怖，轉彎時我睇住旁邊箱水全部懸空飛去我方向，好彩我縮得快。
係太子落車，大包小包的狼狽地行去搭東鐵返屋企
(Guangzhou)
(HK) 
(Guangzhou)
