今日去坐「昂平360」同睇天壇大佛
去到纜車東涌站，因為我地一早買在來回票，所以眼見其他遊客打蛇餅排到出巴士總站(好似佢地要排三句鐘)，我地就不消三分鐘用專用通道走到去換票處，HAHA，有點VIP的感覺。
坐「昂平360」，好大風好凍，但好高，個view同feel都好正，仲望到整個機場，可惜天色不佳。
之後行去參觀天壇大佛，那百幾級樓梯都唔少野。周圍睇完，食完齋，去左睇少林武術表演，睇住佢地飛來飛去對打，好正呀！
影左好多相，又再次考驗我用部Canon 400D，但真係唔多識用，單鏡反光機對背光好敏感，加上天色同光線都好差，d相好黑，仲未掌握到。
之後返回那個「人造」的昂平市集，Annie仔仔喚著要睇「靈猴影院」，所以佢地一家人就買票入去睇，我地就去買紀念品，同埋排定隊，因為回程好多人搭纜車。
夜晚搭纜車，原來仲有feel，周圍都黑漆漆，係群山之上，好靜...... 但好凍
返回東涌，我地行左一陣東薈城(好多outlet舖)，就搭地鐵去青衣城。
