番禺 Panyu Tour (2006.06.27 - Day 3)

2006.06.27 Tue (Day 3 - 繼續探險)


試過尋晚迷路後，我地還未識驚，今朝打算去唔識去的「萬博中心」。

係祈福會所俱樂部飲完早茶，就走出大路，沒有去「萬博中心」的巴士，只有途經香江動物園的13號公車(初時以為萬博中心在香江動物園附近)，點知部巴士係有人賣票，無報站，隨時有人上落車，沿途全是不知名的地方，幸靠途經的巴士站水牌，成功係預定的香江動物園落車。

那裡當然沒有「萬博中心」，咁不如入去動物園玩，但入埸費是￥120，太貴。但附近又無的士同岩路的公車，幸發現有香江動物園的免費接駁巴士，途經長隆動物園同香江酒店，相信那裡會比這裡好，同有的士可截。



接駁巴去到長隆動物園，情況同之前差不多，沒有下車，全車只得我同朋友繼續搭去香江酒店。

去到距離好遠的香江酒店，終於截到的士去到「萬博中心」。但有點失望，那裡其實係大型的家居博覽中心，入面仲有Nike的Factory Outlet，佔地甚廣，出面空地全是泊車的地方，意念像是美國的超級市場。可惜大雖大，舖頭雖又多又齊，但真無咩好睇，個Nike Factory Outlet，亦睇唔上眼，又唔係特別平，仲好似有d舊款。



離開「萬博中心」，靠保安幫我地截的士；發現個天風雲色變，又知道香港掛了一號風球，都係盡怏返回祈福新村為上策。

發覺原來的士比公車更可靠。

覺得我們這兩天有點像電波少年，幸我地有錢搭的士。

返回祈福屋企，hea到夠鐘，就獨自搭中旅Coach離開祈福towards香港，沿途係直通巴影左好多番禺的街相。





係文錦渡成功過關，不用三小時就抵達上水，若果唔係在往深圳的高速公路大塞車，相信會更快。

番禺 Panyu Tour (2006.06.26 - Day 2)

2006.06.26 Mon (Day 2 - 驚險搭錯車)




Lunch去左祈福的半山會所食，好大碟的海鮮炒意粉，好好食！



跟住搭邨巴落去祈福超級市場，好大好多野買，搬住兩個垃圾筒回去。



之後返回屋企，等尋日買部電視送貨來，都好準時；有了電視，整間頓時有了生氣，即睇帶來的DVD －《Scary Movie》。



Dinner去左祈福會所俱樂部內的酒樓，食左超油的海皇粉絲煲&順德釀鯪魚。




Then就開始驚險的旅程，話說我地本想出番禺的市橋，食麥記新出的「Mega Mac」(有四層牛扒的巨無霸)；

咁係祈福蝯巴總站見到一部去市橋的1號線公交，點知全程車的路線係行內街，而且我地誤會左市橋只係一個地標，原來是一個大的area，結果去到所謂的市橋巴總，只是一個好荒蕪好靜的番禺汽車客運站，黑漆漆的情況下處身一個咁的陌生環境，身邊仲有一些唔知做咩的大陸人，同等客的"白牌"電單車，我地又心慌又無助。

最好的方法當然搭原線回去，但d巴士又無司機又無開門開燈，似收車多過會開車，d人又唔似等巴士，周圍黑漆漆死沉沉，又唔敢輕舉莽動，又怕表現出心慌會成為賊人的目標。

不遠處見到有部的士，但又怕是賊車，盤算很久決定博一博，上了那部泥鰍的士，去市橋麥記旁的番禺賓館(￥25.0)，我坐在的士司機旁，表面故作振定，但沿途真係好驚，留意住司機的舉動，同沿途的路牌。

幸好最終安全抵達番禺賓館，找到真正去到祈福的15號公車的巴士站，便入去麥記，即刻去試那個「Mega Mac」，可能係新鮮做，同埋之前嚇一嚇，個飽特別好食，好有肉味。




食完就出去追15號公車，點知考驗還未完結，部巴士的落車鐘壞左，司機又唔知，幸最後都能夠係祈福食街落車，安全返到去。

睇電視廣州新聞，加上尋日見到別人睇的《羊城晚報》，真係覺得好悲哀，真係無野好講，全部花邊新聞，連國際的花邊新聞都大講，就算報導黃色高溫預警，竟然訪問街上的公安有否影響工作，難道公安不是專業的嗎？不過有個受訪的公安也說，這酷熱的天氣還在指揮交通，第一原因是為了養家……

天氣報告還說，因為黃色高溫預警，唔出街的就唔好出街喇！.......好癈

就算播香港的無線新聞，一到敏感的題目，例如示威，就插入廣告，但罷免陳水扁的新聞就照播。仲有，播香港電視的頻道，亦會突然插播歌頌共產黨的節目，甚麼功績同成果…… 很悲哀，新聞封鎖，思想改造……

(p.s.: 夜晚睇《非常外父生擒霍老爺》DVD，結果凌晨四點幾先睡。)

番禺 Panyu Tour (2006.06.25 - Day 1)

2006.06.25 Sun (Day 1 - 撞車)




晨早爬左入灣仔，食完早餐就上中旅社的Coach出發前往番禺。

係文錦渡香港出境，要全車等一個拎住18歲"行街紙"的女仔；係大陸入境，又要全車等兩個拎一次過簽證的，加上兩程Coach的車速都較慢，結果花左3個半鐘才由香港抵達番禺祈福新村。

點知魚貫落車之際，突然感到部Coach猛烈搖晃同聽到碰撞聲，向後一望，嚇見左邊車窗被另一部倒後開出的Coach撞碎，該位置亦正正是我剛才坐的座位，我地都暗呼一聲：「好彩」



之後再轉邨巴去到曉峰園，上到去真係好大，三房一廳，仲有露台，而且望到整個祈福新村。不過現時還未裝修，沒有傢俱，可以話只有牆同門......





Hea了一陣，在邨巴總站附近食了煎餃當lunch，體驗了大陸人的自私同不要臉，打死都不肯讓人搭枱，做到出臉地死霸爛霸。

之後坐了大半小時的對外蝯巴，去了廣州天河城廣場，好辛苦才找到一部傳統的電視機，因為全場差不多都是賣Plasma，不知道是大陸人真的是這麼有錢，還是愛充面子。

買完電視，買了一部風筒，我就買了比香港平近半的鬚刨，因為有八折，本來都諗住在香港買。不過我留意到在廣州的Sales，大多都好殷勤，亦會主動拎件貨俾你任睇，買完之後亦好細心咁教你點用，感覺上是非常friendly的，這是香港Sales值得學習的。好似買電視雪櫃咁，在香港d Sales見到只是兩個後生仔在睇，一定唔會睬你，覺得無錢買，但在這裡，同樣會好細心咁介紹。

之後我地搭地鐵去廣州東站行IKEA，途中見到一個人造的草地廣場同大瀑布。






在IKEA，同香港近乎一樣，見到一盞枱燈幾靚，唔知香港有無得賣。不過在廣州IKEA有一個景象，就係大部份陳列的凳&梳化，甚至床，都有人好hea咁坐，不是試坐，好似係公園咁樣，真樣衰。



本來諗住在IKEA買電視櫃同摺凳，不過運費太貴。

坐番IKEA的免費Coach返天河城廣場，dinner食Pizza Hut。先講講佢地等位的安排，同香港一樣，都是留名留人數，亦都會俾一張單據同編號，但搞笑的係必須要有人在排隊，而且佢地係順序叫位，即係就算入面有二人位，若果排頭位的係4位，係唔會轉叫後面有2位的，同埋中間若果有人走左，佢地係會花好多時間去找那個人，而不會即時叫下位。

不過等咁耐都係值的，因為成間Pizza Hut的侍應是年輕的全女班，態度大多非常友善，而且每?都有專用服務員(我們枱的叫Penny)，結果我地「醉翁之意不在酒」……

行完JUSCO，買左d乾糧，搭返蝯巴回去番禺祈福。但搭第二程邨巴返屋苑時，發現一名賊樣的肥仔跟住我地，100%可疑，上巴士時已被保安攔阻，在巴士上又表現得好緊張，結果佢估唔到我地先讓佢落車同分開行，打亂左佢的陣腳。

全日大部份時間都用係交通上面，尤其是巴士，坐到好累。

海洋公園 Ocean Park (2006.06.20)

海洋公園之旅，超級開心同刺激呀!!! 正!!!

亦都玩晒我以前一直唔敢玩的機動遊戲(人生第一次，之前未玩過，真失禮!!)，好激!!!!!!

我去到海洋公園，先搭纜車上山，then去visit最新開的「水母萬花筒」。不過有點失望，好唔鍾意d展示的effects，館內全黑無燈，靠水缸內的燈睇水母， 但d燈搞到d水母五顏六色，同埋放大左，結果都唔知自己睇左d咩，連介紹水母品種的名牌都黑到睇唔到。




之後去玩攤位遊戲，贏不到Doraemon的公仔......

玩的第一個機動遊戲，係「飛天韆鞦」，熱下身，之前唯一玩過......


then就玩「瘋狂過山車」，最辛苦最唔like的一個，fing得好勁，被頭兩邊的安全護墊像打拳般狂"打"兩邊臉，360度轉圈倒吊時，個頭不自覺地屈低，即同地心吸力對抗，再加上車速的拉力同離心力，部過山車轉左兩個360度的圈後條頸好辛苦好痛......


玩完過山車好暈，但接著就去玩「極速之旅」，即跳樓機..... 玩的時候才真正感覺到甚麼叫做"驚"，跌下去的感覺...... (唔知點形容)，真係嚇到面都青，總之...珍惜生命!!


食左個lunch，就去了睇「海洋館」，係全程最振奮的一個，細個去睇呢個館都唔覺咁正，反而依家大個左，見到咁多難得一見的魚，有魔鬼魚、虎頭鯊、蘇眉、龍躉、海龜........... 真係目不暇及，勁興奮，好多魚的size比人還要大!! 一個字：「嘩!!」

勁唔開心，現在沒有了當初有得睇真企鵝的展館 ><



之後去睇「海洋劇場」，睇海豚海獅表演，雖然細個睇過有d印象，但一樣睇得好開心，笑不攏口，完場時有點不捨同唔夠喉，不過就好掛住以前條殺人鯨海威，可惜已離我們而去。





之後繼續玩機動遊戲，當然少不了「沖天搖擺船」，即海盜船，對我這個天生勁怕離心力的人來說，海盜船的確有點難度，開頭都有點驚，不過見到坐左對面Hillia更驚的樣子，我反而無咁驚，後來開始爆笑。


then就去玩「越礦飛車」，比過山車更快更斜，有四次勁恐怖的俯衝，同跳樓機一樣，個人同腳離開晒張凳，只靠個安全扶手頂住，好~~~~勁，第一次俯衝真係好驚，之後兩次已唔敢張開眼，最後一次迫自己開眼!!!!!! 不過又真係幾正。



之後玩最經典的「滑浪飛船」，d飛船唔同左，變左木柱的形狀。其實衝下來濺出來的水都是在兩邊，不會太濕身，但因為我地沿途互相潑水，結果我地四人大多全身濕晒。


之後搭纜車趕落山去睇熊貓，點知排隊就花左45min，搭纜車時，被先前過山車同越礦飛車影響，心理作用下總覺得部纜車會俯衝下去。

結果去到「大熊貓園」，已開始關館，staff俾我地入埋去，但安安佳佳已經入番去自己間房，只得睇唔清唔楚的閉路電視，勁灰，係全程的最大遺憾，早知一開始就去睇左先。



then好hae咁去行行「金魚大觀園」，d魚缸都熄晒燈...... 見到真正的龜蛋!!(放心，唔係話你係!!)


當然一場來到海洋公園，當然要買紀念品，係「水母萬花筒」出面，就買左個八爪水母公仔，then被Jan誘惑下買了一企鵝公仔，比多年前同樣係海洋公園的企鵝公仔大隻，新的係企鵝BB，勁cute，其實有一隻更加大隻，仲cute，不過要$129，只好攬住影相留念......




(p.s.: 去到邊都會遇到一個女小丑的出現，不過佢把聲不斷扮cute，但真係一d都唔cute，寧願佢用真聲，替佢辛苦)

(p.s.: 好討厭d大陸自由行。雖然內地的經濟發展迅速，但佢地的文化水平同道德修養仍處於未開發的階段，最大問題係仍然固步自封，不思進取...... )